Síldarvinnslan: Uppgjör annars ársfjórðungs og fyrri árshelmings 2026
- Kolmunnaveiðar og -vinnsla gengu vel líkt og árið 2025.
- Gengið vel að selja loðnuafurðir.
- Frystitogarinn Blængur fiskað vel og verð há.
- Ísfiskskipin fiskuðu ágætlega á fjórðungnum.
- Landvinnsla í Grindavík gekk vel.
- Sala bolfiskafurða gengur vel.
- Bruni í Barða
- Áfram áskoranir í fiskeldinu
Helstu niðurstöður úr fjárhagsuppgjöri tímabilsins
- Hagnaður tímabilsins á öðrum ársfjórðungi nam 11,9 m EUR en hagnaður á fyrri árshelmingi nam 47,0 m EUR.
- Rekstrartekjur námu 78,3 m EUR á öðrum ársfjórðungi og 191,9 m EUR á fyrri árshelmingi.
- EBITDA var 27,2 m EUR eða 34,7% á öðrum ársfjórðungi og 73,2 m EUR eða 38,2% á fyrri árshelmingi.
- Heildareignir samstæðunnar í lok tímabilsins námu 951,7 m EUR og eiginfjárhlutfall var 68,6%.
Rekstur
Tekjur á öðrum ársfjórðungi námu 78,3 m EUR samanborið við 67,4 m EUR á öðrum ársfjórðungi 2025. Tekjur á fyrri árshelmingi voru 191,9 m EUR samanborið við 145,9 m EUR á sama tímabili árið 2025. Rekstrartekjur jukust um 11,0 m EUR á öðrum ársfjórðungi miðað við sama tímabil árið 2025, eða um 16,3%. Tekjuaukningin skýrist einkum af sölu á loðnuafurðum og hækkandi verði á mjöli og lýsi.
Rekstrarhagnaður fyrir afskriftir (EBITDA) á öðrum ársfjórðungi nam 27,2 m EUR, en á öðrum ársfjórðungi 2025 var EBITDA 13,9 m EUR. EBITDA jókst því um 13,3 m EUR á milli tímabila. Á fyrri árshelmingi 2026 var EBITDA 73,2 m EUR. Til samanburðar var hún 34,9 m EUR á fyrri árshelmingi 2025.
Hagnaður fyrir tekjuskatt nam 17,3 m EUR samanborið við hagnað uppá 6,2 m EUR á öðrum fjórðungi 2025. Á fyrri árshelmingi var hagnaður fyrir tekjuskatt 60,8 m EUR samanborið við 16,1 m EUR á fyrri árshelmingi 2025. Tekjuskattur var 5,4 m EUR og hagnaður annars ársfjórðungs 2026 nam því 11,9 m EUR samanborið við 4,5 m EUR hagnað annars fjórðungs 2025. Hagnaður á fyrri árshelmingi var því 47,0 m EUR samanborið við 11,5 m EUR á fyrri árshelmingi 2025.
Efnahagur
Heildareignir námu 951,7 m EUR í lok júní 2026. Þar af voru fastafjármunir 761,4 m EUR og veltufjármunir 190,2 m EUR. Í lok árs 2025 námu heildareignir 945,4 m EUR og þar af voru fastafjármunir 769,3 m EUR og veltufjármunir 176,1 m EUR.
Fjárhagsstaða félagsins er sterk og nam eigið fé 652,8 m EUR í lok júní 2026 og var eiginfjárhlutfall 68,6%. Samanborið nam eigið fé í lok árs 2025 alls 625,0 m EUR og eiginfjárhlutfallið 66,1%.
Heildarskuldir og -skuldbindingar félagsins voru 298,9 m EUR og lækkuðu um 21,5 m EUR frá áramótum. Vaxtaberandi skuldir voru 159,3 m EUR í lok tímabilsins og lækkuðu um 35,2 m EUR frá áramótum.
Sjóðstreymi
Handbært fé frá rekstri nam 53,0 m EUR á fyrri árshelmingi 2026 en var 38,0 m EUR á fyrri árshelmingi 2025. Fjárfestingahreyfingar voru jákvæðar um 0,1 m EUR og fjármögnunarhreyfingar neikvæðar um 59,0 m EUR. Handbært fé í lok tímabilsins nam 77,1 m EUR.
Meginniðurstöður í íslenskum krónum á fyrsta ársfjórðungi 2026
Séu niðurstöður rekstrarreiknings ársfjórðungsins og fyrri árshelmings reiknaðar í íslenskum krónum á meðalgengi tímabilsins (1 EUR=143,73 kr), námu rekstrartekjur ársfjórðungsins 11,3 milljörðum, EBITDA 3,9 milljörðum og hagnaður 1,7 milljörðum. Fyrri árshelminginn námu rekstrartekjur 27,6 milljörðum, EBITDA 10,5 milljörðum og hagnaður 6,8 milljörðum. Séu niðurstöður efnahagsreiknings reiknaðar í íslenskar krónur á gengi 30. júní 2026 (1 EUR=144,0 kr), námu eignirnar samtals 137,0 milljörðum, skuldir 43,0 milljörðum og eigið fé 94,0 milljörðum.
Samþykkt árshlutareiknings
Árshlutauppgjör fyrri árshelmings 2026 var samþykkt á stjórnarfundi Síldarvinnslunnar þann 27. ágúst 2026. Árshlutareikningurinn er í samræmi við alþjóðlega reikningsskilastaðla (IFRS - International Financial Reporting Standards).
Kynningarfundur 27. ágúst 2026
Rafrænn kynningarfundur fyrir markaðsaðila og fjárfesta verður haldinn á vefstreymi fimmtudaginn 27. ágúst næstkomandi klukkan 16:30. Streymið verður aðgengilegt á vefsíðu Síldarvinnslunnar https://svn.is/fjarfestar/streymi/. Streymið verður einnig aðgengilegt á streymisrás Síldarvinnslunnar á YouTube. https://www.youtube.com/channel/UC-7V1TcKj92J5Mc9OMMcFZQ/videos
Þá verður hægt að senda spurningar á netfangið fjarfestir@svn.is.
Frá forstjóra
Rekstur Síldarvinnslunnar gekk afar vel á fyrri helmingi ársins og batnaði umtalsvert frá sama tímabili í fyrra. Afkoman er mjög góð þegar horft er til undanfarinna ára og má segja að sannarlega hafi verið vor í rekstrinum.
Góð loðnuvertíð vegur þar þungt. Vertíðin gekk afar vel, bæði veiðar og vinnsla, og tókst að vinna stóran hluta aflans til manneldis. Kolmunnaveiðar hafa einnig gengið vel og afurðaverð verið almennt hátt. Þegar margt fellur saman með þessum hætti skilar það sér eðlilega í rekstrinum.
Það er þó ekkert fast í hendi í sjávarútvegi og fjórðungurinn minnti okkur einnig á það. Í júní kom upp alvarlegur atvik þegar eldur braust út í vélarrúmi Barða skömmu eftir að skipið hafði látið úr höfn í Færeyjum að loknum slipp. Snör og fumlaus viðbrögð áhafnarinnar komu í veg fyrir að verr færi og mestu skiptir að ekkert slys varð á fólki. Vonir standa til að Barði verði tilbúinn fyrir næstu loðnuvertíð. Á meðan hefur Bjarni Ólafsson verið tekinn aftur í rekstur.
Rekstrarumhverfið áfram krefjandi
Þótt rekstur félagsins hafi gengið vel á fjórðungnum er rekstrarumhverfið áfram krefjandi og töluverð óvissa fram undan.
Umræðan um frumvarp til laga um lagareldi var að mörgu leyti óheppileg og eru það vonbrigði að ekki tókst að ljúka málinu á Alþingi. Fiskeldi á Íslandi er ung atvinnugrein sem starfar í harðri alþjóðlegri samkeppni, en býr engu að síður við mjög þunga skattlagningu. Það er mikilvægt að greinin fái skýrt, fyrirsjáanlegt og samkeppnishæft rekstrarumhverfi til framtíðar.
Við höfum jafnframt áhyggjur af stöðu kjarasamninga og þróun efnahagsmála. Ekki hefur tekist að ná nægilegum tökum á verðbólgu og háir vextir hafa áfram áhrif á fyrirtæki og heimili. Við það bætist mikil óvissa í alþjóðamálum. Ófriður í Mið-Austurlöndum og víðar heldur áfram og íslensk útflutningsfyrirtæki þurfa að vera viðbúin því að aðstæður á mörkuðum geti breyst hratt, sbr. verulega miklar hækkanir á olíuverði.
Aflaheimildir og samningar skipta miklu
Óvissa er einnig áfram um samninga Íslands og Færeyja og þar eru verulegir hagsmunir undir. Góð kolmunnaveiði í íslenskri lögsögu að undanförnu er hins vegar jákvæð og styrkir stöðu okkar þar. En að sama skapi er mikilvægt að við eigum áfram gott samstarf við frændur okkar í Færeyjum og því brýnt að ljúka endurnýjun ásættanlegra samninga við þá.
Ráðgjöf Hafrannsóknastofnunar fyrir komandi fiskveiðiár var einnig blendin. Ráðgjöf í ýsu lækkaði um 20% og ráðgjöf fyrir íslenska sumargotssíld um 22%, sem eru ákveðin vonbrigði. Á móti er jákvætt að ráðgjöf í þorski stendur nánast í stað. Þá eru einnig vísbendingar um sterkan ýsuárgang frá 2025, sem gefur tilefni til nokkurrar bjartsýni til lengri tíma.
Jákvæð teikn með loðnustofninn blæs okkur von í brjóst um áframhaldandi góða vertíð í vetur eftir fína vertíð í ár. Er því eðlilegt að horfa fram á veginn með von um að stofninn haldi áfram að styrkjast.
Sterk staða til að takast á við það sem fram undan er
Við getum því verið mjög ánægð með afkomu þessa árshluta. Góður afli, há afurðaverð og góð nýting hafa skilað afkomu sem stendur upp úr þegar horft er til undanfarinna ára.
Við vitum þó vel að ekkert af þessu er sjálfgefið. Sjávarútvegur snýst um að nýta tækifærin þegar þau gefast, bregðast hratt við þegar eitthvað bjátar á og halda áfram að fjárfesta í fólki, skipum, vinnslu og tækni til að vera samkeppnishæf til framtíðar.
Síldarvinnslan stendur sterk eftir góðan fyrri helming ársins. Þótt einhver óveðursský séu fram undan höfum við engu að síður góða ástæðu til að vera bjartsýn til næstu mánaða og ætlum áfram að einbeita okkur að því sem við getum sjálf haft áhrif á: að reka félagið vel, nýta hráefnið sem best og skapa sem mest verðmæti úr þeim auðlindum sem okkur er treyst fyrir.
Fjárhagsdagatal
3. ársfjórðungur 2026 – 19. nóvember 2026
Ársuppgjör 2026 – 4. mars 2027
Nánari upplýsingar
Gunnþór B. Ingvason, forstjóri
Viðhengi
