Árshlutareikningur Reykjavíkurborgar fyrir tímabilið janúar-júní 2026 var afgreiddur í borgarráði í dag, fimmtudaginn 10. september.
Samantekinn árshlutareikningur A- og B-hluta
Rekstrarniðurstaða A- og B-hluta var neikvæð um 5,5 ma.kr. sem var 10,6 ma.kr. lakari niðurstaða en á sama tímabili árið 2025. Í áætlun var gert ráð fyrir 6,7 ma.kr. rekstrarafgangi. Rekstrarniðurstaða fyrir fjármagnsliði og afskriftir (EBITDA) nam 34,7 ma.kr. sem var um 7,8 ma.kr. betri niðurstaða en á sama tímabili ársins 2025. EBITDA í hlutfalli af tekjum var 22,3% og hækkar um 3,8%-stig samanborið við tímabilið janúar-júní 2025. Matsbreyting fjárfestingaeigna Félagsbústaða var neikvæð á tímabilinu um sem nemur 2,3 ma.kr. sem hafði neikvæð áhrif á niðurstöður rekstrar.
Fjármagnsgjöld (nettó) námu 19,7 ma.kr. eða 5,6 ma.kr. hærri á fyrstu sex mánuðum þessa árs en þess síðasta. Vísitala neysluverðs hefur hækkað meira frá áramótum en áætlað var eða um 3,74% í stað 1,75%.
Veltufé frá rekstri nam 26,8 ma.kr. eða 17,2% í hlutfalli af tekjum og hækkaði um 4,0%-stig miðað við sama tímabil 2025.
Handbært fé nam 31,1 ma.kr. í lok tímabils. Fjárfestingar að frádregnum seldum eignum námu 26,5 ma.kr., greidd gatnagerðagjöld og seldur byggingarréttur námu 1,4 ma.kr. Lántaka og ný stofnframlög námu 19,4 ma.kr. á tímabilinu og afborganir lána og leiguskulda námu 17,3 ma.kr.
Heildareignir A- og B-hluta samkvæmt samanteknum efnahagsreikningi 30. júní 2026 námu 1.055 ma.kr. og heildarskuldir ásamt skuldbindingum námu 583 ma.kr. Eigið fé nam 473 ma.kr. en þar af nam hlutdeild minnihluta 19 ma.kr. Eiginfjárhlutfall A- og B-hluta í lok tímabils nam 44,8%.
A-hluti
Rekstrarniðurstaða A-hluta var neikvæð um 3,2 ma.kr. á tímabilinu sem var 3,2 ma.kr. lakari niðurstaða en á sama tímabili 2025. Grunnreksturinn, þ.e. rekstrarniðurstaða fyrir fjármagnsliði og afskriftir (EBITDA) var jákvæð um 7,9 ma.kr. EBITDA var um 4,6 m.kr. betri niðurstaða en á sama tímabili 2025 en 0,3 ma.kr. betri en gert var ráð fyrir í áætlun.
Skatttekjur voru 84,3 ma.kr. eða 1,2 ma.kr. yfir áætlun, þar af var staðgreiðsla útsvars 0,8 ma.kr. yfir áætlun. Staðgreiðsla útsvars hækkaði um 5,3 ma.kr. borið saman við sama tímabil 2025. Launaútgjöld hækkuðu um 2,7 ma.kr. á milli ára sem einkum má rekja til launahækkana samkvæmt kjarasamningum. Gjaldfærsla lífeyrisskuldbindinga var 3,1 ma.kr. lægri en á sama tímabili 2025 en kjarasamningar höfðu töluverð áhrif á gjaldfærsluna árið 2025. Afskriftir voru 2,0 ma.kr. yfir áætlun sem skýrist af viðbótarafskriftum vegna fasteigna til niðurrifs, verkefna sem hætt hefur verið við og hjúkrunarheimilum sem áður voru í sameiginlegri eign ríkis og borgar en fluttust 1. janúar sl. yfir til ríkisins og bókfært verð var afskrifað í samræmi við lög nr. 40/2025.
Fjármagnsgjöld (nettó) námu 3,9 ma.kr. eða 1,9 ma.kr. hærri en áætlun sem skýrist einkum af hærri verðbólgu en áætlað var. Arður af eignarhlutum nam 3,3 ma.kr. en vaxtagjöld og verðbætur námu 7,6 ma.kr. og voru 2,0 ma.kr. hærri en það sem gert var ráð fyrir.
Veltufé frá rekstri nam 8,6 ma.kr. og var 7,9% í hlutfalli af tekjum tímabilsins.
Fjárfestingar að frádregnum seldum eignum námu 9,0 ma.kr. Greidd gatnagerðagjöld og sala byggingarréttar námu 1,4 ma.kr. Lántaka langtímalána tímabilsins nam 7,4 ma.kr. Afborganir lána og leiguskulda námu 5,1 ma.kr.
Heildareignir A-hluta samkvæmt efnahagsreikningi 30. júní 2026 námu samtals 317 ma.kr. og heildarskuldir ásamt skuldbindingum voru 233 ma.kr. Eigið fé nam 83,8 ma.kr. Eiginfjárhlutfall nam 26%.
***
Óvissa um efnahagshorfur er enn mikil og ræðst framvindan að miklu leyti af stríðsátökum og stöðunni á innlendum vinnumarkaði. Hagvöxtur nam 1,3% árið 2025 og var 2,7% á fyrsta fjórðungi þessa árs, en talið er að það hafi hægt aftur á honum á öðrum fjórðungi þar sem einkaneysla hafi líklega gefið meira eftir en gert var ráð fyrir. Talið er að hagvöxtur muni nema 1,4% í ár.
Verðbólga jókst á ný í upphafi árs. Hún var 5,2% að meðaltali á fyrri helmingi ársins og mældist 5,6% í ágúst. Verðbólguvæntingar eru enn yfir markmiði og talin er hætta á að verðbólga reynist meiri en spár segja til um. Peningastefnunefnd hækkaði meginvexti um 0,25 prósentur í mars, maí og ágúst og eru þeir nú 8,0%. Raunvextir miðað við meðaltal mælikvarða eru 3,2%.
Launavísitalan hækkaði um 6,6 % milli ára á fyrri helmingi ársins, og gert er ráð fyrir að launakostnaður á framleidda einingu aukist um 3,8% í ár. Slaki á vinnumarkaði fer vaxandi. Á sama tíma hefur hægt töluvert á fólksfjölgun. Endurskoðunarákvæði kjarasamninga virkjuðust í lok ágúst.
Reykjavík, 10. september 2026.
Nánari upplýsingar veitir
Halldóra Káradóttir sviðsstjóri fjármála- og áhættustýringarsviðs
halldora.karadottir@reykjavik.is