Lánshæfiseinkunn Íslands áfram A+, horfur jákvæðar

S&P Global Ratings birti skýrslu um lánshæfi Íslands. Birting skýrslunnar felur ekki í sér formlega ákvörðun um lánshæfismat. Lánshæfiseinkunn Íslands er áfram A+ með jákvæðum horfum.

Að mati S&P endurspegla jákvæðar horfur einkum batnandi afkomuhorfur hins opinbera á næstu tveimur árum og lækkandi skuldahlutfall. Matsfyrirtækið spáir því að afkoma hins opinbera verði komin nálægt jafnvægi eftir árið 2027.

S&P bendir á sterka stofnanaumgjörð, háar tekjur á mann og skjót og skilvirk viðbrögð við áföllum á borð við heimsfaraldurinn og eldgos. Þetta styður mat fyrirtækisins á því að hagstjórn hér á landi sé almennt skilvirk og stöðug. S&P bendir þó jafnframt á að íslenska hagkerfið sé lítið og tiltölulega fábreytt og byggi að miklu leyti á ferðaþjónustu, sjávarútvegi og orkufrekum iðnaði.

Lánshæfiseinkunn Íslands gæti hækkað ef afkoma hins opinbera reynist betri en S&P spáir nú, til dæmis vegna meiri hagvaxtar, betri árangurs við að halda aftur af útgjaldavexti eða þess að tekjur af frekari sölu eigna yrðu nýttar til niðurgreiðslu skulda. S&P telur jafnframt að áframhaldandi fjölbreytni í atvinnulífinu, meðal annars með uppbyggingu gagnavera, líftækni og lyfjaframleiðslu, geti aukið viðnámsþrótt hagkerfisins til lengri tíma.

Horfunum gæti verið breytt í stöðugar ef hagvöxtur eða afkoma hins opinbera reynist lakari en gert er ráð fyrir. Áhættuþættir eru meðal annars viðvarandi röskun af völdum eldsumbrota, hækkun eldsneytisverðs vegna stigmögnunar átaka í Mið-Austurlöndum, aukin áhrif alþjóðlegra viðskiptadeilna eða mikil aukning útgjalda til varnarmála án mótvægisaðgerða.