Ísfélag hf.: Uppgjör Ísfélags hf. á öðrum ársfjórðungi 2026
Helsta úr starfseminni.
- Félagið var rekið með hagnaði á fyrri helmingi ársins og má það að mestu rekja til góðrar loðnuvertíðar og góðra aflabragða Sólbergs ÓF.
- Hátt verð var á helstu afurðum félagsins.
- Vörubirgðir voru talsverðar í lok tímabilsins en salan hefur gengið ágætlega.
- Uppsjávarafli skipa félagsins var um 41.700 tonn og bolfisk- og rækjuafli um 9.300 tonn á fyrri árshelmingi.
- Framleiddar bolfisk- og rækjuafurðir voru um 5.000 tonn, frosnar uppsjávarafurðir voru um 13.300 tonn og mjöl og lýsi um 7.600 tonn á fyrri árshelmingi.
Helstu niðurstöður úr fjárhagsuppgjöri tímabilsins.
- Rekstrartekjur á öðrum ársfjórðungi námu 45,3 m.USD og 118,6 m.USD á fyrstu sex mánuðum ársins.
- Hagnaður af rekstri tímabilsins nam 4,7 m.USD á öðrum ársfjórðungi og 27,5 m.USD fyrstu sex mánuði ársins.
- EBITDA-framlegð annars ársfjórðungs var 14,2 m.USD eða 31,3%. Á fyrstu 6 mánuðum ársins var EBITDA 45,8 m.USD eða 38,7%.
- Heildareignir námu 873,1 m.USD þann 30.06.2026 og eiginfjárhlutfall var 65,8%.
- Nettó vaxtaberandi skuldir voru 154,1 m.USD í lok júní.
- Arðsemi eigin fjár á öðrum ársfjórðungi var 3,2%.
- Arðsemi eigin fjár síðustu 12 mánuði var 11,0%. Síðustu 6 mánuði var hún 9,7%.
Rekstur.
Rekstrartekjur á öðrum ársfjórðungi 2026 námu 45,3 m.USD og á fyrstu 6 mánuðum ársins 2026 námu þær 118,6 m.USD, samanborið við 75,7 m.USD á fyrri árshelmingi 2025.
Hagnaður af rekstri á öðrum ársfjórðungi 2026 var 4,7 m.USD og var hagnaður á fyrri árshelmingi 2026 27,5 m.USD, samanborið við 9,7 m.USD tap á fyrri árshelmingi 2025.
EBITDA-framlegð á öðrum ársfjórðungi 2026 var 14,2 m.USD eða 31,3%. Á fyrri árshelmingi 2026 var EBITDA framlegðin 45,8 m.USD eða 38,7%, samanborið við 17,7 m.USD eða 23,4% á fyrri árshelmingi 2025.
Efnahagur.
Heildareignir félagsins voru 873,1 m.USD í lok annars ársfjórðungs, þar af voru fastafjármunir 713,5 m.USD og veltufjármunir 159,6 m.USD.
Í árslok 2025 voru heildareignir 865,8 m.USD, þar af voru fastafjármunir 712,7 m.USD og veltufjármunir 153,2 m.USD. Heildareignir hækkuðu um 7,3 m.USD frá áramótum. Rekja má breytinguna að mestu til hækkunar á birgðum og hækkunar á langtímakröfum. Á tímabilinu lækkaði handbært fé. Hækkun á birgðum má að mestu rekja til loðnuafurða sem framleiddar voru á tímabilinu.
Eigið fé Ísfélagsins var 574,8 m.USD þann 30.6.2026, en var 567,0 m.USD í lok árs 2025. Eiginfjárhlutfallið var 65,8% þann 30.06.2026 en í lok árs 2025 var eiginfjárhlutfallið 65,5%.
Nettó vaxtaberandi skuldir félagsins voru 154,1 m.USD þann 30.06.2026 en voru í árslok 2025 153,4 m.USD.
Sjóðstreymi.
Á fyrri árshelmingi 2026 var handbært fé frá rekstri 23,8 m.USD, samanborið við 4,2 m.USD á sama tímabili 2025. Fjárfestingarhreyfingar á fyrri árshelmingi voru neikvæðar um 12,4 m.USD. Fjármögnunarhreyfingar voru neikvæðar um 19,5 m.USD. Lækkun á handbæru fé á fyrri árshelmingi 2026 var 8,6 m.USD, að teknu tilliti til gengismunar og var handbært fé í lok tímabilsins 27,7 m.USD.
Meginniðurstöður í íslenskum krónum á fyrri árshelmingi 2026.
Þegar helstu niðurstöður úr rekstrarreikningi tímabilsins eru færðar yfir í íslenskar krónur á meðalgengi fyrri árshelmings 2026 (123,78) voru rekstrartekjur félagsins 14,7 milljarðar króna, rekstrarhagnaður 4,5 milljarðar króna, hagnaður eftir skatta 3,4 milljarðar króna og EBITDA-framlegð var 5,7 milljarðar króna.
Sé efnahagur félagsins í lok annars ársfjórðungs 2026, færður í íslenskar krónur á lokagengi tímabilsins (126,38), eru heildareignir 110,3 milljarðar króna, fastafjármunir 90,2 milljarðar króna og veltufjármunir 20,2 milljarðar króna. Eigið fé í lok annars ársfjórðungs 2026 var 72,6 milljarðar króna og skuldir og skuldbindingar 37,7 milljarðar króna.
Hluthafar.
Lokaverð hlutabréfa í lok annars ársfjórðungs 2026 var 155,0 kr. á hlut og var markaðsvirði félagsins þá 126,8 milljarðar króna. Fjöldi hluthafa var 2.410.
Samþykkt árshlutareiknings.
Árshlutareikningurinn var samþykktur á stjórnarfundi Ísfélagsins þann 28.08.2026. Árshlutareikningur er gerður í samræmi við alþjóðlegan reikningsskilastaðal um árshlutareikninga, IAS 34. Árshlutareikningurinn hefur verið kannaður af endurskoðendum félagsins.
Frá Stefáni Friðrikssyni forstjóra.
„Ísfélagið skilaði góðri afkomu á fyrri hluta ársins 2026. Ástæðurnar voru góð loðnuvertíð og fín aflabrögð Sólbergs ÓF, frystitogara félagsins, ásamt háu verði á helstu afurðum félagsins. Vörubirgðir voru talsverðar í lok tímabilsins en salan hefur gengið ágætlega.
Annar ársfjórðungur er yfirleitt sá ársfjórðungur þegar umsvifin eru hvað minnst í rekstrinum og þá er tíminn oft notaður til að sinna nauðsynlegu viðhaldi um borð í skipum og í landi. Frystitogarinn Sólberg var í slipp í sex vikur í vor þar sem skipið var m.a. málað, öxuldregið og aðalvélin tekin upp auk annarra hefðbundinna viðhaldsverkefna.
Heildarafli skipa félagsins á fyrri helmingi ársins var um 51.000 tonn samanborið við um 22.600 tonn á sama tímabili í fyrra og framleiddar afurðir voru um 25.900 tonn samanborið við um 13.200 tonn í fyrra.
Í fyrrahaust varð stórbruni í verksmiðju Primex ehf. á Siglufirði, sem er dótturfélag Ísfélags hf. Bruninn hafði veruleg áhrif á starfsemi Primex ehf. en framleiðsla hófst þar að nýju í endurbættri verksmiðju í júlí. Primex ehf. er vel tryggt, bæði eignir og rekstur, því mun bruninn hafa lítil áhrif á fjárhag Ísfélags hf.
Á Þórshöfn var settur upp vigtunarbúnaður fyrir uppsjávarfisk í frystihúsi félagsins og á seinni hluta ársins lýkur rafvæðingu fiskimjölsverksmiðju félagsins í Vestmannaeyjum sem er stórt og ánægjulegt skref til notkunar á grænni orku.
Í júní sl. komu fram tillögur Hafrannsóknastofnunar um kvóta á næsta ári í flestum nytjastofnum. Það voru vonbrigði að sjá tillögur um minnkun á kvóta í íslenskri síld. Ýsa lækkar um 20% milli ára en þorskkvótinn um 1%. Upphafleg ráðgjöf fyrir loðnu er 358.000 tonn. Farið verður aftur til mælinga á loðnustofninum í september og í október er von á niðurstöðum úr þeim leiðangri sem ég vonast til að verði góðar. Í vor fóru fram tilraunaveiðar á humri eftir veiðibann í 5 ár. Niðurstöðurnar voru ánægjuefni en meira var af humri á veiðislóðinni en fyrirfram var búist við. Vonandi verða veiðar á humri í atvinnuskyni leyfðar aftur á komandi árum en Ísfélagið er með 27,25% aflahlutdeild í humri.
Ísfélagið á óbeinan hlut í laxeldisfyrirtækinu Kaldvik á Austfjörðum í gegnum Austur Holding AS. Fjárfesting Ísfélagsins í Austur er liður í stefnu félagsins að breikka tekjustofna þess og styðja við frekari uppbyggingu Kaldvik. Eignarhlutur Austur í Kaldvik AS er 60,02%. Ísfélagið á nú 43,4% hlut í Austur Holding AS eftir að skammtímaláni Ísfélags til Austur Holding AS var breytt í hlutafé.
Ísfélagið er, eins og fram hefur komið í fréttum, þátttakandi í verkefni sem felst í að fanga í gildrur og drepa laxalús sem getur verið plága í laxeldiskvíum í sjó. Niðurstöður fyrstu rannsókna benda til þess að hægt sé að fanga um helming lúsanna með þessari aðferð og framundan eru tilraunir við að prófa lausnina á stærri skala og á sama tíma að þróa og bæta hana þannig að enn betri árangur náist. Verkefnið er unnið af norska nýsköpunarfyrirtækinu LiceDefence AS.
Nú stendur yfir makrílvertíð, sem hófst óvenju seint miðað við undanfarin ár, vegna þess að makrílkvótinn hefur minnkað mjög mikið milli ára. Vegna þessa þurfti félagið að loka frystihúsum félagsins í sumar í langan tíma og tekjur félagsins og starfsmanna til sjós og lands af makrílveiðum munu því dragast mikið saman milli ára. Í næsta mánuði taka við síldveiðar úr norsk-íslenska síldarstofninum og síðar í haust á íslensku sumargotssíldinni. Vonandi getum við hafið loðnuveiðar sem allra fyrst á nýju ári. Almennt eru horfur á mörkuðum fyrir uppsjávarafurðir góðar.
Veiðar og vinnsla á fiski úr sameiginlegum stofnum, svokölluðum deilistofnum, eru mikilvægar fyrir félagið og íslenskan sjávarútveg. í því ljósi er nauðsynlegt fyrir Ísland að ná sanngjörnum samningum við önnur strandríki um sjálfbærar veiðar og skiptingu aflaheimilda úr deilistofnunum. Hagsmunir Íslands eru alltaf best tryggðir í höndum okkar sjálfra. Í því ljósi er undanlátssemi samningamanna Íslands við gerð samnings um makrílveiðar sl. vetur í það minnsta umhugsunarverð.“
Fjárhagsdagatal.
Birting uppgjörs Q3 2026 – 26. nóvember 2026
Nánari upplýsingar.
Stefán Friðriksson, forstjóri, spurningar sendist á fjarfestatengsl@isfelag.is
Viðhengi
