Hampiðjan - sex mánaða árshlutareikningur samstæðu Hampiðjunnar 2026
Lykilstærðir
Allar fjárhæðir í evrum og samanburðartölur í sviga.
- Rekstrartekjur ársfjórðungsins voru 85,9 m€ (94,7 m€)
- EBITDA af reglulegri starfsemi á ársfjórðungnum var 12,6 m€ (12,9 m€)
- Hagnaður ársfjórðungsins nam 4,4 m€ (2,3 m€.)
- Rekstrartekjur fyrri árshelmings voru 183,2 m€ (184,8 m€).
- EBITDA á fyrri árshelming var 24,0 m€ (24,2 m€).
- Hagnaður fyrri árshelmings nam 8,4 m€ (5,2 m€).
- Heildareignir voru 571,0 m€ (547,5 m€ í lok 2025).
- Vaxtaberandi skuldir voru 225,2 m€ (211,4 m€ í lok 2025).
- Handbært fé var 24,1 m€ (26,4 m€ í lok 2025).
- Eiginfjárhlutfall var 49,3% (49,4% í lok 2025).
Rekstur
Rekstrartekjur samstæðunnar voru 183,2 m€ og lækkuðu um 0,9% frá fyrri árshelmingi fyrra árs.
EBITDA félagsins lækkaði um 0,2 m€ á milli tímabila eða úr 24,2 m€ á fyrstu sex mánuðum ársins 2025 í 24,0 m€ á fyrstu sex mánuðum þessa árs.
Hagnaður af áframhaldandi starfsemi eftir skatta nemur 8,4 m€ en var tæplega 7,0 m€ á sama tímabili í fyrra.
Hagnaður tímabilsins nemur 8,4 m€ en var 5,2 m€ á sama tímabili í fyrra en á síðasta ári var farið í að endurskipuleggja hluta af framleiðslustarfsemi félagsins með að loka tveimur rekstrareiningum og var allur rekstur eininganna sýndur í sér línu í rekstrareikningi undir liðnum aflögð starfsemi eftir skatta.
Efnahagur
Heildareignir voru 571,0 m€ og hafa hækkað úr 547,5 m€ í árslok 2025.
Eigið fé nam 281,4 m€, en af þeirri upphæð eru 16,3 m€ hlutdeild minnihluta í eigin fé dótturfélaga.
Hlutfall eigin fjár, þegar hlutdeild minnihluta er meðtalin, var í lok tímabilsins 49,3% af heildareignum samstæðunnar en var 49,4% í árslok 2025.
Vaxtaberandi skuldir námu í lok tímabils 225,2 m€ samanborið við 211,4 m€ í árslok 2025.
Viðskiptaskuldir og aðrar skammtímaskuldir í lok tímabilsins nema 55,6 m€ en námu 56,4 m€ í árslok 2025.
Samandregni árshlutareikningurinn er aðgengilegur á heimasíðu Hampiðjunnar hf., www.hampidjan.is.
Í dag verður haldin fjárfestakynning kl. 16:15 í höfuðstöðvum félagsins að Skarfagörðum 4. Kynningunni verður jafnframt streymt og er streymið aðgengilegt á heimasíðu félagsins, https://hampidjan.is/fjarmal/streymi
Hjörtur Erlendsson, forstjóri:
„Salan á fyrri hluta ársins varð 183,2 m€ sem er eilítið minna en á sama tímabili á síðasta ári þegar salan var 184,8 m€ eða minnkun um 0,9%. Meðan fyrsti ársfjórðungur þessa árs var yfir í sölu þá varð sölusamdráttur á öðrum ársfjórðungi og varð sala fjórðungsins 9,34% lægri en í fyrra.
Samdrátturinn er eingöngu tilkominn vegna minni sölu á veiðarfærum en það kemur ekki á óvart því minni sala hefur verið viðvarandi frá því síðastliðið haust þegar tilkynnt var um verulegan niðurskurð á kvótum til makríl- og kolmunnaveiða. Í kjölfar ráðgjafar Alþjóða hafrannsóknaráðsins (ICES) og samninga þeirra þjóða sem veiða úr uppsjávarstofnum mun makrílveiði í ár dragast saman um 48% frá fyrra ári og kolmunnaveiði um 41%.
Þessi þróun hefur leitt til þess að útgerðarfélög fara varlegar í nýfjárfestingar og leggja aukna áherslu á að nýta betur þau veiðarfæri sem þegar eru til staðar í rekstrinum.
Minnkandi þorskkvóti í Barentshafi hefur einnig haft veruleg áhrif á sölu veiðarfæra, sérstaklega í Norður-Noregi. Kvótar á svæðinu hafa verið skornir umtalsvert niður á undanförnum árum og á þessu ári um 16%. Hins vegar hefur ýsukvóti verið aukinn um 18% á svæðinu en aukningin er mun minni í magni en sem nemur minnkun þorskkvótans.
Að auki hafa takmarkanir Evrópusambandsins á sölu til rússneskra útgerða, sem landa afla úr sameiginlegum veiðistofni Rússlands og Noregs í Barentshafi í norskum höfnum, haft umtalsverð áhrif og dregið úr sölumöguleikum á markaðnum. Hert hefur verið á takmörkunum og nú er einnig óleyfilegt að selja vörur úr stáli og það bitnar á sölu á lásum og krókum ásamt sölu á togvírum og toghlerum.
Starfsþáttayfirlitið, sem innifelur fjóra þætti, þ.e. móðurfélag og framleiðslu, veiðarfæri, fiskeldi og útsjávariðnað sýnir vel þær breytingar sem hafa orðið það sem af er þessu ári. Sala í veiðarfærum hefur minnkað um 10,6% á fyrrihluta þessa árs miðað við síðasta ár en á móti hefur sala í fiskeldishlutanum vaxið myndarlega um 14,1% og úthafsiðnaður um 13,5%. Ráðandi þættir í sölu samstæðunnar eru veiðarfæri og þjónusta við þau og nýr búnaður fyrir fiskeldi svo sem fiskeldiskvíar og fastsetningarbúnaður ásamt viðhaldi á fiskeldiskvíum, þvotti, viðgerð og endurnýjun gróðurvarnarefna. Framleiðsluhlutinn hefur einnig vaxið mikið eða um 21,0% sem skýrist af innkomu Kohinoor á Indlandi og meiri framleiðslu hjá Hampidjan Baltic fyrir úthafsiðnað.
Framlegð eftir hráefni og vinnulaun hækkar úr 27,1% í 29,0% á fyrri hluta ársins en móti kemur hærri rekstrarkostnaður þannig að rekstrarhagnaður fer úr 8,8% í 8,6%.
EBITDA á fyrri hluta ársins varð 23.958 þús € samanborið við 24.233 þús € í fyrra en hlutfallið er það sama bæði árin eða 13,1%.
Fjármagnsliðirnir á síðasta ári voru óhagstæðir og þar munaði mest um gengismun og minni fjáreignatekjur eftir að kaupin á Kohinoor voru að mestu fjármögnuð með innistæðum á krónureikningum með góða ávöxtun. Í ár er staðan allt önnur og betri hvað þetta varðar.
Vaxtatekjur lækka á milli ára úr 563 þús € í 269 þús € en vaxtagjöld lækka meira eða úr 6,730 þús € í 6,321 þús €. Samanlagt þá lækka þessir tveir liðir úr 6,167 þús € í 6,052 þús. Gengismunurinn sem var neikvæður um 1,976 þús € á síðasta ári er nú jákvæður um 567 þús. Samanlagt lækka fjármagnsliðirnir úr tæpum 8,1 m€ í rúmar 5,3 m€ eða um rúmar 2,7 m€.
Hagnaður eftir skatta er nú 8,4 m€ á móti 5,2 m€ í fyrra. Breytinguna má rekja til hagstæðari fjármagnsliða í ár og þess að aflögð starfsemi á síðasta ári var 1,8 m€ en engin starfsemi hefur verið aflögð á þessu ári.
Gera má ráð fyrir að lægri veiðikvótar hafi áfram neikvæð áhrif á sölu flottrolla á komandi hausti og vetri. Við því hefur verið brugðist með hagræðingu og fækkun starfsmanna þar sem þess hefur verið kostur, án þess að skerða þjónustu eða viðbragðsflýti enda er mikilvægt að full þjónusta sé til staðar þegar á þarf að halda.
Jafnframt er mikilvægt að hafa í huga að staða annarra veiðistofna í Norður-Atlantshafi er almennt stöðug og stór hluti af sölu veiðarfærafyrirtækjanna tengist botnvörpuveiðum, meðal annars á þorski, ýsu og rækju.
Góð loðnuvertíð í vetur skilaði útgerðarfélögum á Íslandi umtalsverðum ávinningi. Auknar veiðar leiddu jafnframt til meiri notkunar á nótum, sem hafði verið takmörkuð undanfarin tvö ár vegna loðnuleysis. Þetta hefur skapað töluverð verkefni hér á landi í sumar og áfram í haust þegar farið er yfir næturnar og þær undirbúnar fyrir næstu vertíð.
Þrátt fyrir samdrátt í veiðarfærasölu þá hefur framleiðsla á veiðarfæraefnum hjá Hampiðjan Baltic í Litháen verið stöðug þótt eðlilega hafi minna verið framleitt af netum og köðlum vegna sölusamdráttarins. Verkefnastaðan er í lagi eins og er með vaxandi pöntunum eftir sumarfríin. Stöðugt hærra hlutfall af efnisþörf veiðarfærafyrirtækja, sem hafa bæst í samstæðuna undanfarin ár, skilar sér í auknum verkefnum hjá framleiðslufyrirtækjum samstæðunnar, bæði hjá Hampiðjan Baltic og Kohinoor á Indlandi.
Eldi, fyrirtækið sem var stofnað innan samstæðu Hampiðjunnar í byrjun ársins til að sinna fiskeldismarkaðnum, hefur gengið framar vonum eins og sjá má á 14,1% aukingu í sölu á fiskeldisbúnaði og þjónustu við fiskeldisfyrirtæki á fyrri hluta þessa árs. Miklir möguleikar eru framundan enda hefur verið unnið ötullega að markaðsstarfi og vöruþróun sem er að bera ávöxt á þessu ári.
Áfram er unnið að hagræðingu í kjölfar sameiningar fyrirtækjanna, sem mynda Eldi, í byrjun ársins og snýr sú hagræðingarvinna fyrst og fremst að starfseminni í Noregi eins og er. Fullur rekstrarárangur mun hins vegar ekki verða sýnilegur fyrr en framleiðsla fiskeldiskvía er komin að mestu til Kohinoor á Indlandi. Eins og áður hefur komið fram þá er einnig nauðsynlegt að hafa getu til að framleiða fiskeldiskvíar í Evrópu til að mæta óskum viðskiptavina um stuttan afgreiðslufrest því stundum koma upp aðstæður í fiskeldinu sem ekki voru fyrirséðar og krefjast skjótrar afgreiðslu.
Verkefnastaðan í fiskeldisbúnaði er góð og framleiðslan skiptist nú á framleiðslufyrirtækin tvö í Litháen og Kohinoor á Indlandi. Í Litháen eru bókuð verkefni fram til loka október og er staðan svipuð hjá Kohinoor.
Ágætar pantanir hafa borist í ofurstroffur til framleiðslu og afhendingar í haust og byggjast þær pantanir á getu Hampidjan Baltic til að hanna og framleiða stærstu ofurstroffur sem þörf er á í heiminum ásamt því að geta álagsprófað þær í slitbekknum sem settur var upp á síðasta ári og getur álagsprófað stroffur með allt að 2.000 tonna átaki.
Verð á hráefnum, einkum pólýethýleni og nyloni, sem hækkaði verulega eftir átökin í Íran, virðist vera að ná jafnvægi aftur og verð hafa farið lækkandi. Þrátt fyrir átökin hafa ekki verið nein vandamál með aðgengi að þessum efnum í sumar, framboð hefur verið stöðugt og afhendingar á áætlun.
Þegar hráefnisverð hækkar skyndilega, líkt og nú hefur gerst, en búist er við að hækkunin sé tímabundin, er beitt sérstöku hráefnisgjaldi sem endurspeglar kostnaðarhækkunina og tryggir að hún skili sér inn í verðlagið. Unnið hefur verið samkvæmt þessu fyrirkomulagi og nú fara hráefnisgjöld lækkandi.
Orkukostnaður í Litháen, bæði rafmagn og gas, er stöðugur og telst í jafnvægi.
Fyrr í sumar voru kynntar tvær mikilvægar hagræðingaraðgerðir sem snúa að veiðarfæragerð í Noregi og framleiðslu toghlera í Litháen.
Við stofnun Eldi um síðustu áramót var þremur félögum í samstæðunni skipt upp í veiðarfæraframleiðslu og fiskeldisþjónustu og eitt af þessum fyrirtækjum var Vonin Refa sem starfar í N-Noregi. Eftir að fiskeldishlutinn hafði verið aðskilinn undir nafninu Eldi Refa þá stóð eftir veiðarfæragerðin með upprunalega nafninu Vonin Refa. Í Noregi starfrækjum við einnig veiðarfæragerðina Mørenot Fishery sem er með starfsemi víða í Noregi og nú hafa þessi tvö félög verið sameinuð undir nafninu Mørenot Refa. Unnið er að hagræðingu starfseminnar og árangurinn af því mun koma að einhverju leyti fram á haustmánuðum en að fullu frá áramótunum. Á sýningunni NorFishing, sem er stærsta sjávarútvegssýningin í Noregi, í síðustu viku komu sameinuðu fyrirtækin fram undir nýja nafninu og hefur þessari breytingu verið afar vel tekið af starfsmönnum fyrirtækjanna og viðskiptavinum.
Hin hagræðingaraðgerðin sneri að sameiningu hleraframleiðslu innan samstæðunnar en tvö fyrirtæki hafa sinnt þróun og framleiðslu á toghlerum. Það er Mørenot Fishery (nú Mørenot Refa) með Injector toghlera og Vónin í Færeyjum með hleraframleiðslu undir eigin nafni. Dótturfyrirtæki Mørenot Refa í Litháen, Baltic Sea Steel, hefur framleitt Injector toghlerana en Vónin hefur unnið með undirverktaka í Litháen sem hefur smíðað þá toghlera.
Hagræðingaraðgerðin felst í því að eignarhald Baltic Sea Steel er fært til Vónin og framvegis verða allir toghlerar samstæðunnar smíðaðir hjá Baltic Sea Steel og öflug þróunardeild Vónin í hlerum tekur samhliða við allri vöruþróun í hlerum. Vörumerkin tvö verða sameinuð undir einu nafni sem verður kynnt á haustmánuðum. Þessi hagræðingaraðgerð mun skila meiri framlegð í virðiskeðjunni til samstæðunnar og efla markaðsstarf og sölu á hlerum.
Uppbygging á iðnaðarsvæðinu í Auric á Indlandi gengur vel en þar er verið að byggja tvo stóra framleiðslusali sem eru 28.000 m² hvor ásamt 1.200 m² þjónustubyggingu fyrir starfsmenn og skrifstofu sem er 2.000 m². Byggingarleyfi á landinu er fyrir 16.000 m² til viðbótar sem verður nýtt síðar. Til að setja stærðina á framleiðslusölunum í samhengi þá þekur hvor bygging fyrir sig flatarmál sem samsvarar fjórum fótboltavöllum í fullri stærð. Fyrri stóra byggingin er komin vel á veg og búist er við að hún verði tilbúin til afhendingar í lok október. Sú bygging er ætluð fyrir framleiðslu á fiskeldisnetum. Hin stóra byggingin er fyrir framleiðslu á netum fyrir bæði fiskeldi og veiðarfæri. Áhugasamir geta skoðað drónamyndband af byggingarstaðnum sem tekið var fyrr í þessari viku og það verður sett inn á fréttasíðu Hampiðjunnar eftir uppgjörskynninguna.
Gert er ráð fyrir að seinni stóra framleiðslubyggingin verði tilbúin um áramótin og aðrar byggingar fljótlega í byrjun næsta árs.
Þegar seinni byggingin er tilbúin þá hefst flutningur á netahnýtingunni sem er staðsett í Hampidjan Baltic. Það er tímafrekt verkefni vegna stærðar og umfangs og mun taka meginhlutann af næsta ári en fyrstu vélarnar ættu að vera komnar í gang í byrjun næsta árs og síðan koll af kolli fram á næsta haust. Eins og fyrr sagði þá er salurinn 28.000 m² og vélarnar sem verða fluttar taka um 11.500 m² af svæðinu og það svæði sem eftir er er ætlað fyrir þær vélar sem eru nú þegar staðsettar í Selu, þar sem núverandi neta- og kaðlaverksmiðja Kohinoor er staðsett, auk þess verður fjárfest í fleiri vélum til að auka framleiðslugetu fyrir fiskeldisnetin.
Mikil hagræðing fylgir þessum flutningum og aukningu á framleiðslugetu því framleiðslukostnaður á Indlandi er ekki nema brot af samsvarandi kostnaði í Evrópu.
Ef þessar breytingar ganga eftir áætlun þá má búast við því að næsta ár verði helgað uppbyggingu á framleiðslunni í Auric. Árið 2028 gæti því orðið fyrsta rekstrarárið þar sem nánast allar stærri hagræðingaraðgerðir, breytingar og framtíðaruppbygging er komin á þann stað sem stefnt hefur verið að undanfarin ár eftir hlutafjárútboðið sumarið 2023.”
Viðhengi
